Hoër aftree-ouderdom vir predikante?

PRETORIA. – Die aftree-ouderdom vir predikante kan dalk na sewentig verhoog word as sekere sinodes hulle sin kry.

Die predikant vir Teologiese Opleiding by Tukkies, dr Flip du Toit, sê daar is sterk geluide dat die aftree-ouderdom van predikante weer op maksimum 70 jaar vasgestel moet word.

Dit volg na ’n vergadering van die Gesamentlike Sinodale Kommissie (van die vier sinodes Noord van die Vaalrivier) met die Predikante-pensioenfonds wat onlangs gehou is.

Van die redes wat aangevoer word, is onder meer ’n langer lewensverwagting en die verwagte tekort aan opgeleide predikante in die kerk.
Dr Du Toit sê daar is geen Bybelse voorskrifte vir die aftree-ouderdom van predikante nie. Dit het deur die eeue, maar veral die afgelope klompie dekades, baie gewissel.

In talle kerke is daar geen aftree-ouderdom nie. Dit word as ’n lewenslange roeping gesien. Die pous van die Rooms-Katolieke Kerk bly byvoorbeeld in sy amp tot hy sterf.

Dr Du Toit sê binne Gereformeerde kringe het die besef veral in Nederland posgevat dat die predikant nie onbepaald kan dien as predikant nie. Die afgelope paar dekades het die aftree-ouderdom van predikante binne die NG Kerk interessante wendings geneem. Aanvanklik was daar geen aftree-ouderdom nie en het dit dikwels gebeur dat predikante in die tuig sterf.
Sedert Julie 1957 moes predikante op 70-jarige ouderdom aftree. Die verpligte aftree-ouderdom is later op 65 vasgestel. Tussen ongeveer 1990 en 2005 was daar ’n redelike oorskot van opgeleide predikante in die NG Kerk en was die aandrang baie sterk dat predikante op enige ouderdom vanaf 55, maar veral vanaf 60, behoort af te tree.

Met die vermindering van die oorskot opgeleide predikante moes daar egter nuwe reëlings getref word. Die Algemene Sinode van 2007 het toestemming verleen dat emeriti tussen 65 en 70 in termyngekoppelde poste kan dien.
Dr Du Toit sê die nuutste voorstelle vir die verhoging van die aftree-ouderdom is maar net een verdere trappie in die lang verhaal oor wat die geskikste ouderdom is om die roeping nie meer op voltydse basis te beoefen nie.
– jean@tydskrifte.co.za