Geloof en wetenskap in gesprek

BLOEMFONTEIN. – In aansluiting by die Internasionale jaar van Sterrekunde, is ’n mini-konferensie in Bloemfontein aangebied waar die moontlike sintese tussen geloof en wetenskap bespreek is.

Shepherd, sentrum vir die begeleiding van geestelike leiers, die UV se Fakulteit Teologie en die Boyden-wetenskapsentrum, het saamgewerk in die aanbied van die geleentheid. Prof Fanie Snyman van die Departement Ou Testament (UV) het die verskillende perspektiewe op die skepping in die Ou Testament bespreek.

Die boek Spreuke in die Ou Testament maak ook ’n spesiale bydrae tot die gesprek oor die skeppingsverhaal. Prof Rian Venter van die Departement Dogmatologie (UV) het ’n oorsig oor ’n paar teoloë se siening oor geloof en wetenskap gegee.

Die kosmos is groot genoeg vir lewe, het prof Matie Hoffman, van die Departement Fisika verduidelik. Tydens die aandprogram het prof Hoffman almal die geleentheid gebied om die heelal te beleef terwyl hulle na sterre deur een van die Boyden-teleskope kyk. Die ander wetenskaplike wat aan die debat deelgeneem het, was prof Johann du Preez van die Departement Plantwetenskappe.

Hy het uitgebrei op konsepte soos evolusie, ko-evolusie, dateringstegnieke en kenmerke van lewende organismes. Daar was ook geleentheid om na fossiele van duisende jare oud te kyk. Almal was dit eens dat so ’n gesprek tussen wetenskaplikes en teoloë baie insiggewend is.