STELLENBOSCH. – Die NG Kerkfamilie vaar "skandalig sleg" in sy pogings om eenheid in die kerk te bereik en is in die algemeen nie ernstig genoeg oor eenheid nie.

So het ‘n voormalige moderator van die NG Kerk, dr Coenie Burger, tydens ‘n studentekongres op Stellenbosch gesê.

Studente van al vier teologiese fakulteite in die land, naamlik Stellenbosch, Pretoria, Bloemfontein en Potchefstroom, het die kongres bygewoon wat saamgeval het met die jaarlikse "Vier Nasies-Kweektoer" tussen die vier universiteite.

Dr Burger het tydens een van die sessies gesê die kerk is nie ernstig genoeg oor eenheid nie. Dit is volgens dr Burger ‘n ernstige teologiese fout wat gereformeerde kerke in hulle mondering het.

Die gesloer met kerkeenheid in die NG Kerfamilie is ook in ander gesprekke geopper. Die rektor van die Universiteit van Stellenbosch, prof Russel Botman, het kerkleiers in sy toespraak gewaarsku die stadige pas van hereniging is besig om mense uit die kerk te dryf.

Prof Botman sê die kerk is besig om lidmate te verloor wat steeds daar moes gewees het wanneer die kerke hopelik uiteindelik wel verenig.

Hy het kerkleiers gewaarsku hulle sal nog dink hulle is besig om te herenig dan het die kerk reeds te veel lidmate in die eenheidsproses verloor wat moeg ("fed up") geraak het vir die stadige pas waarmee daar gevorder word.

Baie van die studente het prof Botman se ongeduld met die stadige tempo van hereniging gedeel. "Ons as studente vind dit makliker om die grense oor te steek, maar word teruggehou deur ouers wat uit ‘n ander era kom," het een van die teologiestudente tydens ‘n paneelbespreking aan vier van die NG Kerkfamilie se leiers gesê. - jean@tydskrifte.co.za