Hoop vir haweloses van Voortrekkerstraat

PRETORIA. – Die projek Open Mind het as ’n droom begin om aan mense wat op straat woon, waardigheid te gee. Xenia Swanepoel en ’n groep vriende wou nie net kos en klere aan haweloses gee nie, maar wou egte verhoudings met hulle bou.

“Elke Sondag kom ons in ’n parkie bymekaar en hou saam ’n kerkdiens,” vertel Xenia. Orf Oosthuizen neem gewoonlik die preek waar.

Uit gesprekke met die mense wat op Voortrekkerstraat bly, het die lede van Open Mind besef dat hierdie mense ophou hoop het om uit hulle situasie te kom. Open Mind wil graag aan hierdie mense ’n droom gee. Die doel is nie om haweloses met Bybelversies te bombardeer nie, maar eerder om Jesus se gesindheid te leef.

Open Mind is op praktiese hulp gerig. Vrugte en gekookte aartappels word aan haweloses uitgedeel, want dit het ’n hoë voedingswaarde. Klere van skenkers word gesorteer en op Sondae uitgedeel. Elke tweede week word kos, wat lede van Open Mind uit hulle eie sakke aankoop, uitgedeel.

’n Projek om met prostitute te werk word beplan. “Ons is tans besig om strukture in plek te stel sodat ons hierdie vroue van die straat af kan haal. Prostitusie is dikwels deel van georganiseerde misdaad en mensehandel; dit is kompleks om prostitute te help om ’n ander lewe te lei,” sê Xenia.

Vir meer inligting, besoek www.openminder.org
francine@tydskrifte.co.za