Pres Zuma se jammer is nie genoeg

Dit is nie net oor sy flukse libido waaroor pres Zuma oor die vingers getik behoort te word nie. Sy letterlike vermenigvuldiging van mense is iets waaroor die aarde van hom rekenskap gaan vra. Veral van sy kinders.

In Kopenhagen was ons president een van die leiers wat die ontwikkelde lande aangepor het om iets daadwerklik vir die aarde se toekoms te doen. Hy, wat ons afgevaardigde daar was, weet dat oorbevolking ‘n belangrike rat in die komplekse saak is.

Die jongste telling is dat daar 6,8 miljard mense op die aarde woon en dit word beraam dat ons teen 2050 ongeveer 9 miljard sal wees. Tot dan gaan ‘n reeds honger Afrika se bevolking verdubbel terwyl die VSA en Europa se getalle gaan afneem.

In Suid-Afrika het ons die slegte scenario dat daar reeds teen 2020 nie genoeg drinkwater vir al ons mense gaan wees nie. Ons sukkel om ons eie mense uit armoede te kry, dan praat ons nie eens van die massas wat uit buurlande hierheen stroom nie.

As mnr Zuma as rolmodel gevolg word, gaan ander mans ook vrye teuels aan hulle drange gee. Ek verstaan dat baie mammas in die townships, wat reeds huil oor hulle mans se ontrouheid, in moedeloosheid versink het oor die optrede van die president.

Mnr Zuma kan sy apologie opvolg deur vir die operasie te gaan. En dit bekend te maak. En sommer ‘n veldtog begin dat ons strewe na ‘n gehalte samelewing. ‘n Samelewing waarin ons mense geleenthede wil gee om te ontwikkel en waarin ons sensitief vir moederaarde is.

Dit is verblydend dat die president uit eie geledere aangespreek is oor sy seksuele gedrag. Dit is skokkend om te weet dat ‘n staatshoof in ‘n moderne era, homself verontskuldig deur hom te beroep op ‘n vervloë kulturele gebruik.