Skoolsisteem het dringende ingryp nodig

As die skole blom, blom die land. As skole verlep en uitmekaar val, dan verlep die land en val uitmekaar. Die verband is so duidelik soos daglig.
Daarom behoort die skoolsisteem die regering van die dag se eerste prioriteit te wees.

Wanneer ’n samelewing uit behoorlik opgevoede en toegeruste burgers bestaan, het niemand meer nodig om deur misdaad aan die lewe te bly nie. Opgeleide mense maak ’n groot bydrae tot die ekonomie en die ontwikkeling van die land. ’n Land van selfstandigheid en kunstigheid. Waarin ons goed lewe. Want ons kan. Want ons het geleer hoe.

’n Verlepte land, waar onderwys uitgetoiing het, ervaar meer misdaad, meer armoede, meer verlies aan kundige mense, meer bedelary. Dit word ’n land wat net oorleef, wat kla en wat geen selftrots meer het nie.

Die tekens is daar dat ons onderwys-sisteem vinnig verlep. Matriekresultate word by die jaar swakker. Daar is kommer oor die standaard van die kurrikulum. Ingryping is nodig, en dit moet vinnig en op groot skaal plaasvind.
Wat alles gedoen moet word weet ek nie, maar myns insiens is minstens die volgende sake noodsaaklik:

Daar sal ’n houdingverandering by baie onderwysers moet plaasvind. Tradisioneel was meester of meneer ’n inspireerder, ’n life coach, ’n vriend. Dit was sy trots om kinders basiese vaardighede aan te leer en om hulle toegerus na die volgende vlak te stuur. Baie leerkragte het nie meer daardie gesindheid nie.
Onderwys moet as ’n gesogte beroep gesien word en die beste mense moet daarheen gelok word. Dit beteken beter vergoeding en beter werksomstandighede. Swak onderwysers moet uit die sisteem geneem word.

Dit is bekend dat onderwys in onderontwikkelde en arm omgewings die meeste sukkel. Die kinders wat daar moet leef, verdien dit nie. Dit is tyd dat politieke vooroordele gelos word en dat goeie en ervare onderwysers uit tradisioneel suksesvolle skole daar gebruik word.