Ester inderdaad 'n ster

Ester die musical
Met Lindi victor, Joe Niemand en Raoul Beukes.
In die Staatsteater, Pretoria.
Resensent: Anton Pienaar.

Ester die musical is nie ’n sentimentele opvoering met ’n verskuilde godsdienstige motief nie. Die ou Joodse volksverhaal word met respek hanteer. En dit in pragtige Afrikaans waarin die kreatiewe dialoog en oorspronklike musiek en lirieke jou trots laat voel.

Die verhaal van Ester handel oor die wel en weë van ’n Joodse gemeenskap in ballingskap in die magtige Persiese ryk van ouds.

Die verhaal het al die elemente van ’n briljante drama. Daar is die skone heldin Ester – wie se naam ster beteken – wat haar ware identiteit moet wegsteek. Die slinkse meester van die hof, Haman, wat met ’n verterende ambisie leef. Die gerespekteerde koning Xerxes (Ahasveros) wat graag die vreugde van sy magtige ryk wil geniet, maar in dieselfde asem aanslae op die troon moet afweer. En natuurlik die wyse Mordegai, wat die simbool is van ’n onwankelbare Joodse geloof en integriteit.

Die vervaardigers se besluit om dié musikale blyspel met ligtheid en humor in te kleur, maak van die produksie ’n genotvolle ervaring.

Die oorspronklike Afrikaanse musiek en lirieke van die gewilde Joe Niemand val lekker op die oor. Heel dikwels het dit gevoel of die musiek ’n kabaret-karakter het, en dit het pragtig geharmoniseer met tipiese ou Joodse volksmusiek.

Raoul Beukes, as Mordegai, se wonderlike diep basstem het opnuut bekoor. Dit is jammer dat Kate Normington, wat die rol van koningin Vasti gespeel het, nie meer gehoor kon word nie.

Die toneelspel, wat hier en daar ’n bietjie onseker is,  word gedra deur die gesoute akteurs. In die eerste deel van die opvoering het Matt Stern puik gevaar as Haggai, terwyl Gys de Villiers as die geslepe Haman ongetwyfeld die anker was in die tweede deel.

Die dekor is vindingryk en die effektiewe beweging daarvan dra by om die vol storielyn te behou.

Die tema wat deur die medevervaardigers, Renier en Lise-Mari Keyser (Add Life-productions) en Joe Niemand (Nomansland) in Ester die musical na vore gebring word, is geloof. Geloof soos dit in die ou Joodse verhaal in die lewe van Mordegai en Ester gevind word. Die manier waarop met die tema gewerk is, maak dat Jode en Christene dit ewe veel behoort te geniet. Dit is ’n musiekspel met baie pret en hope integriteit. Die vervaardigers van Ester die musical verdien eer vir ’n produksie wat applous van ’n wye verskeidenheid gehore behoort te kry.

- Ester die musical word van 7 September tot 2 Oktober 2011 in die Staatsteater in Pretoria opgevoer.