Samelewing het weerlose oop kerk nodig

Ek is ook een van die ouens wat op die kerm-wa klim wanneer ek hoor van korrupsie en nepotisme. Byna soos die plae in Egipte van ouds, word ons daarmee geteister. Waar ’n mens ook al kuier, hoor jy van een of ander gekonkel. êrens is iemand weer onregmatig bevoordeel en iemand anders benadeel. En alles gebeur agter dig toegetrekte gordyne.

“Waar is die deursigtigheid?” roep ons in argwaan. “Julle werk met ons belastinggeld en in die donker dief julle daarmee!” Ondeursigtigheid en onderduimsheid is dikwels bedmaats.

Die kerk word ook soms van ondeursigtigheid beskuldig. Soms is die beskuldigings nie geldig nie, maar dikwels het dit meriete.

Die skade van om agter die gordyn te handel, is iets wat die doeners nie altyd mooi bereken nie. Hulle dink hulle doen reg en glo dit is tot almal se beswil. En soms is dit! Maar ondeursigtigheid skep persepsies wat die beste bedoelings en planne kan kelder.

Een goeie voorbeeld was in die verlede toe die Afrikanerbond (AB) nog ’n geheime organisasie was, en talle predikante en lidmate aan die organisasie behoort het. Die AB het waarskynlik wonderlike werk gedoen, maar terugskouend het die geheimhouding meer skade veroorsaak as wat die organisasie ooit sou kon voorsien.

Daarom is ek ’n voorstander vir openheid. Deursigtigheid. Doen en praat eerlik in die ope. Al maak jy soms foute. Dit is veral belangrik vir ’n kerk wat ’n openbare instansie is, en wat aan al sy lidmate behoort. Vergaderings, agendas en notules moet oop wees. So ook motiewe en standpunte. Almal moet weet wat hulle aan jou het. Lidmate sowel as buitestanders.

Hulle moet weet waarmee jy besig is. Jy moet hulle die geleentheid gee om jou te vertrou. Geleentheid om jou te kan steun en om, waar nodig, jou op oordeelsfoute te wys. Dit is juis die weerlose openheid van die kerk wat hom sy integriteit gee.

Natuurlik is daar soms sensitiewe kwessies waar mense se waardigheid op die spel is en waar dit liefdevol is om eerder stil te bly. Sulke situasies het niks met die deursigtigheid te doen waarvoor ek pleit nie.

’n Deursigtige, eerlike kerk of gemeente sal ervaar dat sy lidmate met groter vrymoedigheid naderstaan. Hulle sal hom vertrou en met groter vrymoedigheid aan sy projekte deelneem. Gemeentelede wat goed ingelig is, sal hulle kerk en gemeente liefhê vir wie hy is.

’n Kerk wat geloofwaardig deursigtig is, kan vir ’n gordynsamelewing dalk net die nodige inspirasie word. Iemand wat deursigtig lewe, wat niks het om weg te steek nie, dwing altyd respek af.