Maak die gesprek oor kerkhereniging oop

Die gesprek tussen die NG Kerk en die VG Kerk was nog nie in ’n donkerder doodloopstraat as nou nie. Ek was nog nooit by enige amptelike gesprekke oor kerkhereniging betrokke nie. Maar ’n mens kan dié afleiding maak as jy gehoor het wat prof Piet Strauss (moderator) en dr Kobus Gerber (algemene sekretaris) onlangs aan die vergadering van die moderamen daaroor gesê het.
My voorspelling is dat dit in die donker gaan bly, of op ’n reuse krisis afstuur, tensy die verdere gesprek in die ope gehou word. Die styl van klandestiene onderhandelinge oor sensitiewe sake, maak dié wat buite staan skepties en ongeërg. My vermoede is dat die massas NG lidmate wat op kerkhereniging die rug gedraai het, dit gedoen het omdat hulle geslote gesprekke nie vertrou nie.
Waarom kan almal nie weet wat die dorings in die VG Kerk se voet is nie? En wat is die duwweltjies wat die NG Kerk pla? As almal weet wat dit is, en daaroor praat, mag dit net verteerbaar word, en mag daar nuwe moontlikhede ontstaan.

Wat hou die kerke uitmekaar? My raaiskoot is dat die VG Kerk die NG Kerk daarvan verdink dat hy steeds rassisties is. Dat hy neersien op die VG Kerk. Dat hy ongehoorsaam is aan die Bybel en nie die geskiedenis wil regstel nie. Dat die NG Kerk nie eens wil luister as die VG Kerk die Belydenis van Belhar nader bring en sê dit is hoe hulle die Bybel oor kerkhereniging verstaan nie. Die NG Kerk is ryk en is bang dat hy na hereniging moet deel.

Die NG Kerk-leiers se dilemma is dat hulle die aanspraak op hereniging verstaan. Maar wanneer die VG Kerk gevra word om begrip te hê vir die pragmatiese probleme wat lidmate van die NG Kerk met kerkhereniging het, is daar geen tegemoetkoming nie. Lidmate vra wat is die werklike motief vir strukturele kerkeenheid. Wat van die taal van vergaderings en teologiese opleiding? Taal is vir Afrikaanse mense baie belangrik, want taal is wesenlik deel van wie hulle is. Wat van die teologiese verskille? Is daar agter die obsessie oor kerkhereniging ’n verskuilde motief by lede van die VG Kerk wat hulle hande op die eiendomme of pensioenfondse van die NG Kerk wil lê?

Ek het dalk nou slegte en verkeerde afleidings en stellings gemaak. As iemand kwaad is, jammer. Maar dit is waarskynlik hoekom baie min mense erg het aan die herenigingsproses. Want ons weet nie. Daarom die versoek. Kom uit die donkerte. Maak die mense wat saak maak, deel van die gesprek.