My maa sê hoera! hoera! vir daai aster wat so mooi hardloop sy is net vies vir die atletiekooms wat uit gewoonte so teen die witspan is. Ai sug oom Cyril hy hoop net sý lag die laaste nie skoppensboer of enige ander rassekaart nie. Hy sê daar is darem iets om voor dankbaar te wees ons kan byvoorbeeld bly wees sy is nie ’n ambisieuse doppermeisie nie dink net dáárdie partikuliere geredekawel.
Maar WAAR was doomnie toe sy terugverwelkom is? My maa sê sy weet nie of doomnie kans kry om op lughawens rond te lê nie die ooms in die voorste bank kla hoeka dat doomnie net een dag per week werk, oom Cyril sê daai is in elk geval ’n volle vier en twintig uur langer as julius-die-slimme, my maa sê miskien moet hulle daardie intellektueel minister van die soldate of van die snelbusse maak DIT sal hom onder skoot én weg van diverse aanloopbane hou, sy wil hoeka ter wille van almal se senuwees aanbeveel dat iemand ’n toets op hom doen dalk is hy nooit ’n ware mens nie bloot ’n verbeeldingsvlug of hoogstens ’n nare droom.

Oom Cyril sê hý sal nooit daarvan droom om vlugtelingstatus in kanada te gaan soek nie dáár sal hy altyd soos ’n aspoestertjie tussen die sneeumanne voel, gie-gie! giggel my maa, dáái astertjie het mos nou ’n eensklapse klankie bygekry, jip! sê oom Cyril as ’n skoen jou pas en jy weier aanhoudend om dit aan te trek gee die reuk jou uiteindelik weg, Cyril Cyril sê my maa HOE gaan jy ooit weer jou voete op daaipotch kan sit? Gûh! sê oom Cyril só graag wil ek darem ook nie in ’n spotprentjie wees nie.

Maar doomnie hoef nie bang te wees vir karikature kreature of ander deputate nie en beslis nie vir énige soort toets nie veral nie toetse down under nie ons vertrou mos op daardie prins van afrigters peter-die-bokwagter om te sorg dat niks breek nie NIE sy verdedigingspatroon sy lynstaankodes sy selfvertroue sy beloftes oor engelspraat of sy stem nie. Gideon in my klas sê sy pa sê die toets vir die volle ware opregte geloof is of jy in vreemde tale kan praat, my maa sê daai ou moet vir oom Cyril hoor as iemand hom met versies uit levitikus gooi.
Maar óns mik na niemand nie ons toets net so af en toe die kapasiteit van die agterste bank, ek en my maa